Mga Tula ni Rene Calalang
 

SA MGA LUMISAN

 
Ni Rene Calalang
Scarborough, Ontario
& Malolos, Bulacan
 


Igalang mo naman ang Ina mong Bayan na iyong iniwan

Dapat mong isiping ikaw ay bahagi ng bayang nilisan

Ang tunay na anak ay hindi lilimot kahit ka nasaan

Hindi magbabago’t hindi magkukulang angking pagmamahal.

Kung sa ibang bayang iyong pinuntaha’y ika’y nagtagumpay

At iyong natamo ang inaasam na kasaganaan

Iyo ring nakita at naunawaan ang mga dahilan

Kung bakit may bansang mayaman at tayo ay bansang mahirap.

At kung isang araw ikaw ay bumalik sa bayang iniwan

Ang iyong nakitang mga kahirapan ay huwag tawanan

Sa iyong isipa’y iyong gunitain ang bayang nilisan

Ang iyong nakita't naging karanasan ay magsilbing aral.

Huwag kang magtaka at huwag husgahan ang mga namasdan

Sa iyong sarili ay iyong sagutin isang katanungan

Ano ba ang aking ginawa upang malunasan mga nasaksihan

At tayo’y matulad sa bansang maunlad na pinanggalingan.

…o…